Oratoriu

Me ha llegado una carta del artista asturiano Ánxel Nava en la que fabula sobre el recuerdo de lo que fue la inauguración de la exposición INTROITO en la galería de Lola Orato, en un lejano 31 de enero:

ORATORIU

            Introito

      Introibo ad altare dei, gorgutó embaxo’l retablu col pescuezu engoláu na casulla d’oru de San Idefonsu, que rellumaba como cuadru del Greco. El diáconu gargoliaba’l cantu d’entrada a la misa tridentina. Cuspió y cola manga esborró un gotu de cera qu’emporcaba la escritura. Resonaben les llábanes de cantería d’aquel oratoriu que les artes del infiernu nun fueren a valtar. Con estes piedres -calletró- faigo la parede la poesía, l’arte de la pallabra. Yo soi el facedor de la obra na divina proporción. Entós vio la lletra la herexía caltriada na muria. ¿Qué ye, que vas allevantate escontra Dios?... Y sintió l’argullu de Llucifer: Malañu pal pecáu, nun vini a otra cosa.

            Salmu

        El misacantanu nun yera alcordase d’aquella salmoria de monagu que recitaba cola sotana colorada y l’alba de puntiellina blanca. Ad deum qui laetificat iuventutem meam, retrucó cola enchipada mocedá del cura nuevu. El llatín nun da de comer, pero a él daba-y abondo de fartar pal consumu ritual del cuerpu místicu. Misa est divisa in partes tres: introitus, fellatio y coitus, pedricaben los llatinaxos de cuando de seminarista ficiera los cantos d’entrada al paraísu vulvar, gloria de la natura... Sintió surdir del muru voces de fema y pegó la oreya al oratoriu. El diañu me lleve, llambióse, el mio petite inconfesable ye la inmersión llinguística: La llinga nel coñu d’una beata.

            Cantoral

        La rexenta empecatada quedó pesllada dientro l’oratoriu. Aporrió la puerta, glayó hasta esgañitase: Sacáime d’equí, arrenuncio a Satanás, arrenuncio a la carne, arrenuncio a la obra, gorgolitaba afogada como monxa pelaya que nun algamare a dar la nota. Nun la sintió nin dios. Lloramicó, desesperó, dióse llueu y aseló calma. Qué muerte tan fata, acabar atrapada colos olios y el vinu misa, entarrada en vida como una sacerdotisa ibérica. La orate naguaba por que l’artista oficiante abriera la pesllera y entrare a rescatala, apaeciera al treslluz cola cámara vidéu: Llegasti a lo cimero, una escena puta madre pal documental. Entós taría salva, diría ella: -Mio mante, yá pues grabar el final.

ÁNXEL NAVA